Kaa tuzungumze

2010-08-24T04:13:00.000-07:00

Habari za Miaka mingi? Nilienda kuoa sasa nimerudi

Wakulima wetu!

2008-06-26T01:12:00.001-07:00

Picha kwa hisani ya Charahani.
Nimepitia Blogu ya charahani leo nikakuta picha ya kuvutia sana.

Picha hii inaonyesha moja ya vijana wanajitahidi kujenga afya zetu kwa kutumia akili zao katika kilimo. inafurahisha sana kuona kwamba kuna vijana katika nchi hii wenye uwezo wa hali ya juu katika kilimo na kuzingatia wanaanzia bila mtaji wowote lakini wanafanikiwa kutunza bustani katika hali hii!
Hii inaonyesha jinsi tusivyohitaji wawekezaji toka nje katika sekta ya kilimo kama inavyosemwa na wachache kati yetu ikiwamo waheshimiwa wetu waliopo pale bungeni. Sijui hawa wanatoa wapi owoga walionao, nashangaa jinsi wasivyojiamini na kutodiriki kufanya uchunguzi wa kina ili watambue uwezo tulionao katika kilimo miongoni mwa vijana wa Tanzania. Naona hawa wachache bado hawajua faida ya kilimo kama biashara na kuainisha matatizo wanayopata wakulima wetu hata kushindwa kukiendeleza.
Ninasema kwa majigambo kuwa "wakulima" wetu wanafanya kazi kubwa sana na wanamafanikio mazuri sana ukiangalia mazingira wanayofanyia kazi, mitaji wanayoanza nayo na teknologia wanayotumia! kiasi wanachozalisha ni kikubwa sana na bado kuna uwezekano wa kuzalisha zaidi kama tunataka wafanye hivyo. Jana kwenye luninga wakulima wa mbinga walisema kwa mafunzo ya shamba darasa waliopata toka kwa mtaalamu wa kilimo katika wilaya yao wamefanikiwa kuzalisha kahawa nyingi kuliko walivyotegemea na walivyowahi kuzalisha.
Sijui kama hao wawekezaji katika kilimo watatoka kwa mungu, ambako hatuwezi kuhoji uwezo wao!, au watatoka bara jingine , ambao tukienda jifunza nao huwa tunaonyesha uwezo wa hali ya juu kuliko wao, ndio waje walete mapinduzi ya kilimo nchini mwetu! kichekesho kikubwa sana hiki.
Uwekezaji unaingia kwa kishindo katika kila sekta, sijui kama wananchi watapata nafasi huru ya kuwekeza katika sekta yeyote, tutaishia kushindana vita ya kushindwa na Bunge Ltd toka marekani wakati sisi tunanyimwa fursa ya kupata mitaji.
Sijui hizo sekta zinazopewa kipaumbele kama kusamehewa kodi kwa kipindi fulani, kutengewa maeneo maalumu na vituo maalumu vya kuwasaidia wanafaida gani kwetu kama kilimo kilivyo.
Sioni tutakachopoteza kama tunachopoteza kama hatutafanya chaguzi au tunavyofuga uzembe katika Tanesco, tukiweka pesa zetu kwenye kilimo ambacho ninakipa umuhimu wa hali ya juu kuliko sekta zote hapa nchini. Tunahitaji mapinduzi ya Kilimo kama tunataka maisha bora kwa kila mtanzania. Mapinduzi ya kilimo yatapatikana kwa njia zifuatazo;
-kuweka wananchi katika vikundi/ushirika wa kilimo
-kupatia hivi vikundi/ushirika uweza wa kukopa dhana za kisasa za kilimo
-kutoa mafunzo ya kilimo cha kisasa kwa vikundi/ushirika wa kilimo
-Kuhakikisha masoko yenye kutoa bei halali kwa mazao ya kilimo kama wafanyakazi wengine wanavyolipwa mishahara halali
-Kuhakikisha matendo ya ufisadi katika sekta ya kilimo yanakemewa kwa adhabu kali sana, hata kifo, kwa atakayepatikana na kosa la kuhujumu kilimo.

Hakuna Maisha bila kilimo.

NIMEPOTEZA MDOGO WANGU

2008-01-23T01:25:00.000-08:00

Tarehe 17.01/2008 ilikuwa siku mbaya sana kwangu, baada ya kuwa na shaka ya siku tatu kuhusu hali ya mdogo wangu Majaheni T Newa nilipokea habari ya kusikitisha sana kuhusu kifo chake.Mazishi yalifanyika tarehe 19/01/2008.
Majonzi yaliyonikuta hapo sijui kama sio ndugu, jamaa na marafiki kunituliza yangenipeleka mahali ambapo hakuna ambaye angeamini.

Nashukuru wale walioshirikiana nami katika kipindi hicho kigumu na vilevile kuomba msamaha kwa wale ambao tukio hilo liliwagusa na tukashindwa kupatiana habari.

Matapeli wa Kishairi - Lyrical Crooks

2007-08-05T23:30:00.000-07:00

Come listen to me
I made a discovery
I wanna share it with you
I have you know that is true

Multi-nationals are really criminals
all forms of gambling
there is no way you can win
open your eyes guys
its time you realize
that the rise in price
is to make more money
for those who has got plenty
and the trick of the trade
is to keep the hungry be listen empty

It’s the break of the day
its time you have to say
you have been sleeping all night
now its time for the light
come see lyrical crooks
who have learn their tricks by the books
so come disciples of god
who rule with an iron rod

Mtunzi: Bob Andy
Wimbo: Check it out
Album: Retrospective

Bob Andy katika wimbo huu anatutahadharisha na watu anaowaita “lyrical crooks” akimaanisha “matapeli wa kishairi” waliojifunza utapeli kwa kutumia vitabu, inawezekana ni kitabu cha Shakespeare au kile chetu cha abunuwasi au hivi vya kisasa na kidini. Watu wa aina hii wako wengi sana hapa kwetu na kibaya zaidi ni wale tunaowaamini sana, wanafanya maamuzi yakutuumiza halafu wanakuja na mashairi yao mazuri waliotumia muda mrefu kuyatunga na kuyakariri wakituhadaa tukubaliane na maamuzi yao kwamba yatatusaidia wakijua mwishowe ni matatizo kwetu na sio kwao.
Ingawa ni wimbo wa zamani kidogo lakini mtunzi alishaliona hili jinamizi la utandawazi kwa kupitia mtangulizi wake “Multi-nationals”au makampuni ya kimataifa! yenye utaifa! Sijui hawa watu huwa wanafikiria nini kwa dude hili, kuendeleza nchi? Kujiendeleza? Au kuingiza majina yao kwenye vitabu vya historia ( His-Story) kwamba waliwasaidia kukuza mitaji ya wale wanyehaki ya kuimiliki dunia? Nikiutafakari huu Utandawazi, huwa nashindwa kujielewa, hivi almasi na dhahabu nyingi zilizochimbwa Shinyanga na watu wasiokuwa wa-Tanzania, zikapelekwa Japan/Malaysia kuchongwa na Baadae kuuzwa kwenye soko la London na mapato yake kuhifadhiwa kwenye benki ya Australia zitanyanyua uchumi au pato la Tanzania kuliko ile kidogokidogo na itakayoendelea kuwepo kwa muda mrefu sana, iliyochimbwa Shinyanga, na wa-Tanzania, kisha kupigwa mnada Dar es salaam, bila kujali inapelekwa wapi, kisha mapato yake kuwekwa kwenye benki ya NMB! Lazima mmoja wetu atakuwa anakichaa! Na anacheza kamari, kama karata tatu, ambayo huna uwezo wa kushinda.
Wanaendelea na utapeli wao wa kishairi, wanapandisha bei kwa mashairi mengi yanayotuambia kuwa wanatujali! Huku wanachukua kidogo kwa wasionacho na kwaongezea wenye kingi sana! Na kuendelea kutubembeleza tuwasikilize wakijua tumeshakata tamaa.
Siku mpya itaanza tuu, tutaamka toka usingizi tuliolala siku nyingi sana, jua likituangazia tupate usemi wa kuwaambia tukiongozwa na mtume toka kwa mungu mwenye kuongoza kwa kutumia mkono wa chuma

Hawa wana nini kwenye vichwa vyao?

2007-06-26T01:16:00.000-07:00

Kila mara nasikiliza rege kupata ujumbe uliopo ndani yake. Na muda huu nikiandika nimevutiwa na kazi ya Bob Andy (pichani) yeye anaanza kwenye wimbo wake wa “Fire Burning” na swali hili
“ Would I have to ask you leaders what do you have in minds?”
Naona hili swali liko kwenye wakati muafaka kwenye kipindi hiki, Napenda kumuuliza Waziri Mama wa Fedha, Anafikiria nini kwenye akili yake kupanga bajeti kama ile aliyoisoma Juzi bungeni? Isitoshe makada karibu wote wa CCM wanaiunga kwa nguvu zote sijui nao wana njama gani na sisi wafanyakazi wa nchi hii, wote wana-CCM na wapinzani.
Bajeti hii inaelekeza kupandisha bei ya bidhaa zote zijulikanazo hapa Tanzania. Sijui katika hali hii ambayo kila mtu analia hali ngumu ya maisha mwingine anataka bei zizidi kupanda, bila kutupa mkakati unaoeleweka wa kuzikabili hizo bei.
Bob Andy ameendelea kutuambia,
“You are protesting on the wrong side of the fence”
“ read the lines on your fence you will be safe for sure’
Tumepiga makelele makali sana kuonyesha kutoridhika na hiyo bajeti, lakini ikapita kwa kishindo kikali sana, na mhariri wa gazeti la chama na kongwe zaidi aliweka habari ya juu kwamba Bajeti yapita kwa kishindo!, labda ni sisi ndiyo tuliipinga tukiwa tumekaa upande mbaya ambao makelele yetu hayakusikika! Au hatukusoma ishara kwenye kuta zetu tukajiingiza kwenye haya matatizo na sasa tunajua tukiwa tumechelewa!
Nikamkumbuka Mutabaruka katika shairi lake wa “Revolutionary Words” naye alisema,
“Revolutionary words have become Entertainment, Dramatizing the suffering of people in their revolutionary words”
hiki ndiyo kilichofanyika bungeni! Makelele yote waiopiga wabunge, hasa wa CCM, yalikuwa ni maigizo ya jinsi wananchi watakavyo hangaika na kulia na mzigo waliobebeshwa na bajeti hiyo. Walipochekesha Kiasi cha kutosha wakarudia kwenye kazi yao – kudai posho zao nono. Hesabu posho za siku moja walizopewa Taifa Stars utajua wanachukua ngapi kwa siku!
Linton Kwesi Johnson naye alishatuambia kwamba,
“The JLP, cyant set wi free,
the Liberate dem cyant do it fi wi,
make dem gwaan, now wi come,
wi haffi storm like a rising sun.”

Benjamin Zephaniah yeye alikataa kupewa tuzo ya OBE (amepewa Salman Rushdie juzi juzi akazua balaa kwenye jamii ya kiislamu) na malkia wa Uingereza sababu anaendelea kuunga mkono unyonywaji na ukandamizaji unaofanyika ulimwenguni.
Bado Bob Andy aliendelea kuwakumbushia kuwa,
“ Hell a go run loose, if you don’t delivering”
huu ujumbe uwafikie wanye kazi ya kupanga na kusimamia maendeleo ya Watanzania wakae vizuri kabla jehanamu haijajifungua hapa jirani, wajue maneno aliyoingia nayo JK ikulu na wajue tupo millioni na zaidi tunaotafuta nafasi ya kuyatekeleza kwa vitendo!
(picha zote kwa uhisani wa internet)

Bado Nipo

2007-03-23T07:33:00.000-07:00

Habari za Mwaka mpya? Mambo mengi yamejitokeza tangu kuanza kwa mwaka huu, mengine yanakubalika na pia mengine hayakubaliki wali kutegemewa, licca ya hayo yote nilipotea kwa muda mrefu kidogo bila kutoa salaam zangu za mwaka mpya, ingawa nilipita kupokea zilizotolewa na wenzangu.
Kazi bado zinaendelea, Blog zinaongezeka na wanablog pia wanaongezeka. Yule jamaa wa annony... bado anasumbua! anaweka posting zake kwangu ambazo sijui nifanyie nini lakini we acha tuu! iko siku atakomeshwa.
Kipenzi cha afrika, Mugabe, ameingiwa na kasheshe nyingine, naona inafanana na ile iliyotokea Denmark lakini haikuwa "issue" kubwa sana kama anavyofanyiwa Mugabe ingawa hakuna mtu aliyekufa kama Denmark, Tunasimama naye na udhalimu utashindwa.
Nyumbani majambazi yamerudi tena wiki hizi zilizopita, lakini "sangoma" wao hana nguvu za kuishinda jamii, wote watatulizwa.
Sikujua kama watu huwa tunakamiana kiasi hiki bila sababu ya maana na za aibu kama madeni anayolalamika Vitali Maembe kuachiwa na kaka yake, .... kuberi dukani kwa mpemba, bangi kwa pusha jeda na gongo kwa mama ..... . Bado najifikiria hili lilikuwaje lakini nimeathiriwa na jambo hili hivyo nitaliongelea nikiwa na habari za uhakika.
Mambo yanabadilika, barabara iliyoliliwa siku nyingi, kilwa, imeanza kutengenezwa tunaomba isiwe nyembamba kama ile ya shekilango, naona sasa ndugu zetu akina baa wa ntwara watapata ahueni ya usafiri ingawa bado wana mshale wa nauli za juu unawangojea wao. Tuombe mwaka huu ubadilishe hali kidogo.
Tulipata ugeni wa kimataifa, maaskofu wa kianglikana walifanya mkutano hapa Tanzania, maazimio yao kidogo yalifanana na Watanzania, labda sababu hii ni nchi takatifu hata ukija na dhamira zako chafu hutaingia nazo! Nadhani na Umoja wa Mataifa nao uje fanya mikutano yao hapa pengine nao watafikia maamuzi yenye busara.
Jumiya ya Afrika Mashariki inatangazwa na viongozi lakini kila wakienda wananchi wanaikataa, sijui kuna nini hapa, hili sijalifuatilia vizuri maana lina mawazo yanayochanganya sana. Umoja tunauongelea siku zote, ingawa sio kama wa muungano wa Tanganyika na Zanzibar ambao formula yake anajua Mwl Nyerere peke yake naye sasa hayupo duniani, naona tuvute subira turekebishe mambo mengi kwanza kabla hatujaingia huko.
Blogu bado zinahitaji kudumishwa kwa nguvu zote.

Kikwete uso kwa uso na Al-Bashir

2006-11-07T01:08:00.000-08:00

Wakati viongozi wa Afrika wanakutana na wenzao wa Uchina huko Beijing, China kuna mikutano mingine ya chini chini inaendelea baina ya viongozi wa nchi za kiafrika wanaohudhuria Mkutano huo mkubwa unaotarajiwa kulipatia manufaa makubwa sana bara la Afrika.
Uchina huwa haiamrishwi na Marekani na rafiki zake washirikiane na nani, hivyo maadui wakubwa wa jamii ya Marekani nao pia watahudhuria Mkutano huo mkubwa ambavyo Vyombo vya Habari(uongo!) wameanza kuutilia shaka bila ya kuwa na shaka na mambo yao wenyewe. Viongozi wa Afrika walioalikwa yumo kinara wa Afrika Raisi Bob Mugabe wa Zimbabwe aliye kwenye orodha kuu ya maadui wa magharibi, pamoja na Raisi wa Sudani Bwana Al-Bashir ambaye anasahau uafrika wake na kubariki kuangamizwa wenzake wa jimbo la Durfur kwa Sababu wao ni weusi zaidi yao! Na nywele zao ni ngumu sana!
Bila shaka, lazima Raisi wetu Mhe. J Kikwete na wenzake wengine watapata wasaha wa kukutana na Bw. Al-Bashir, na kufanya mazungumzo yaliyo au yasiyo rasmi. Ingawa kuna mambo mengi sana ya kuongelea ikiwamo ruhusa ya Tanzania kutumia maji ya Ziwa Nyanza! kukaribisha wawekezaji toka Sudan, uhusiano baina ya nchi hizi mbili. Ila bila kuongelea na ikibidi kukemea tabia au kusudi la Bw. Al-Bashir la kufumbia macho mauaji ya Durfur atakuwa hajawatendea haki watanzania na waafrika wote kwa ujumla, pia atakuwa hajatekeleza kipengele cha ilani yake ya uchaguzi aliyokuwa ameikariri kuliko misahafu kipindi cha kampeni cha kushughulikia migogoro ya jirani zetu.
Sitegemei kama kuna Mtanzania anayeunga mkono mauuaji hayo yanayoendelea kwa kasi sana, huku serikali ya sudan ikitajwa kuliimarisha jeshi la wauaji kwa kuwapatia silaha na kuzuia jeshi la nje kuingilia kati mauaji hayo.
Hivyohivyo, ingawa China ametuita kutupatia msaada naye inabidi aambiwe kwamba soko lake la silaha la Sudani linatuumiza sana kuliko hiyo misaada anayotaka kutupatia hivyo aache kuwauzia silaha wasudani na kwanza aingilie hayo mauaji ya Durfur na kuhakikisha yanakoma la siyo hiyo misaada yake haitakuwa na maana kwetu na itatuchefua zaidi kuona waafrika wanazidi kuuawa ili zipatikane pesa za kutusaidia !
Kama masuala haya pia yatakuwa agenda kwenye mkutano huo basi bara la Afrika litakuwa limetendewa haki ya kweli.

Ya Mugabe yamekemewa haya jee?

2006-09-15T04:06:00.000-07:00

Nadhani ni wachache sana wanaojua kisiwa kinachoitwa chagos, kisiwa hiki kipo karibu na Tanzania kwenye bahari ya hindi na zaidi vipo karibu na visiwa vya mauritius. na wakazi wake ni waafrika weusi na matabaka mengine.
Kumbuka Ulimwengu wa Magharibi ukiongozwa na uingereza, Australia na Marekani wanavyompigia kelele na vitimbi vya kila aina shujaa wetu Bob Mugabe kwa kuwanyang'anya/ kuwapunguzia ardhi wazungu wachache pale Zimbabwe waliokuwa wamejilimbikizia ardhi huku weusi wengi wakiwa hawana ardhi hata za kujenga vibanda vya kuishi na familia zao.
Nimekuta katika jarida la New African toleo la Agosti/september 2006 Habari inayosikitisha na kuwaumbua hao kuwa wanachotaka Zimbabwe sio demokrasia wanayoisemwa ila kuna jingine lililojificha. Katika kipindi cha miaka ya 1965, na 1973 wakazi zaidi ya 2,000 wenyeji wa visiwa hivyo walifukuzwa toka kwenye visiwa hivyo na Uingereza na Marekani wakihamishiwa uhamishoni kwenye visiwa vya mauritius na shelisheli ili visiwa vyao vitumike kama vituo vya kijeshi vya Uingereza na Marekani na pia kwa utalii.
Wenyeji wa visiwa vya Chagos hawakukubaliana na uamuzi huo wakaendesha kampeni ,toka siku hizo mpaka leo bado wanaendelea, katika kesi iliyohukumiwa na mahakama kuu ya uingereza na mheshimiwa jaji Cresswell na Jaji Hooper kuwa uamuzi wa kuwafukuza haukuwa na busara na unachukiza wao, serikali ya Uingereza wanaukataa na kung'ang'ania kukata rufaa juu ya hukumu hiyo huku wakishinikizwa na rafiki zao Marekani kwa kuhofia usalama iwapo wa-chago watarejea kwenye ardhi yao ya asili.
Najaribu kufananisha hizi hali mbili; chagos na zimbabwe bila kupata jibu, ila nimeona kuwa hii ni vita nyingine ya kukomboa sehemu nyingine ya bara la afrika iliyosahaulika na ambayo hakuna anyeitangaza.

Maamuzi na Maazimio

2006-08-19T00:42:00.000-07:00

Unafanya maamuzi na kuyatimiza!
Unaamua nitakuwa nakula mara moja kwa siku ili niushinde ugonjwa wa "obesity" unafanya hivyo mpoka unazoea na 'obesity' haiwi tena tatizo la kusumbua akili yako.
Unaamua kuwa kibaraka, unakuwa na kutajirika kwa gharama ya waliokuwa wazalendo wenzako.
Unaamua kuwa wa dini hii, na unakuwa.
Unaamua kutovaa viatu kwa sababu zako na unaacha kuvaa viatu kama alivyofanya Mutabaruka.
Hata kama huwezi kuwaeleza wengine wakubaliane na maamuzi yako lakini hayo ndiyo maamuzi yako mwenyewe na unaamini yanamanufaa kwako.
Tatizo kubwa ni pale unapofanya maamuzi yako na kuyatekeleza kwa gharama za wenzako na bila ridhaa yao hata kama watayakubali kwa kuburuzwa ndipo yanakuwa sio maamuzi mazuri.
Wiki chache zilizopita Dunia ilikuwa kwenye kilio kikubwa kutokana na vita ya Hamas Na Israeli, ingawa sasa mapigano kwa kiwango kikubwa sana tunasema yamesimamiswa lakini inabidi tuliangalie suala hilo sasa, nini kilileta mapigano hayo? Ardhi ya waarabu, uchokozi wa Hamas, au ubabe wa waIsraeli? Hakukuwa na njia nyingine ya kufuata kutatua matatizo hayo zaidi ya kusababisha mauaji ya maelfu ya watu? majibu ni mengi kuliko maswali.
Ukiamua kujenga nyumba yako mabondeni mimi hainihusu mradi tu usizibe ule mto ufanye kipindi cha masika maji yafurike mpaka nyumbani kwangu.
Hawajama walioamua kuwa 'mateja' haituhusu kama hawatatuingilia, tunapiga kelele sababu hawana njia nyingine ya kupata pesa kwa ajili ya hiyo starehe yao zaidi ya kuvunja nyumba zetu, kutuchomolea mifukoni kutukaba na hata kutudhuru hadi kifo, kama watakuwa na njia nyingine za kutimiza strehe zao nadhani tusingejali sana ilimradi hawakai kwenye mapito yetu kama takataka(kwa uchafu) zinazosubiri kupelekwa dampo na kutubughudhi.
Ukiamua kuwa masikini asiye na malengo hakuna atakayekuingilia, ila wanasiasa fulani watatumia hali yako kujipatia umaarufu kama hutakuwa thabiti kwenye maamuzi yako.
Mtoto akiamua asipende kusoma kwa sheria za sasa mwalimu hatahangaika kumfuatafuata, jua hakielimu wanapigia debe walimu wasiruhusiwe kuchapa viboko bila kutoa njia mbadala kwa mazingira ya Tanzania, akiogopa sheria na kujua mwisho wa mwezi mshahara ni uleule wa kutumia wiki mbili aanze tena kukopakopa.
Ukiamua kuwa hivi kuwa mradi huwaingizi wengine kwenye maamuzi yako na wengine wanatakiwa kuwapa nafasi wenzao kuwa wanavyotaka kama anavyofanya mungu kwa kuwapa nafasi sawa watu wote.

Afrika inathaminiwa vipi na ....

2006-06-21T06:09:00.000-07:00

Wakati sisi tunawaza kwenda ughaibuni kutafuta maisha kuna wengine wanalilia kuja Afrika kutafuta maisha na kuishi, watu hawa wana sababu za msingi kuhusu uamuzi wao wa kuja kuishi na kuendesha maisha yao Afrika. Wimbi hilo la watu kuja kuishi afrika linaendelea hadi kwa waafrika wenzetu wanaoishi uhamishoni. Ingawa inakuwa vigumu kidogo kwao kuchagua mahali pa kuhamia lakini hawa wameshafanya uamuzi wao au wako njiani

Mkaribisheni mgeni.

2006-05-23T04:13:00.000-07:00

Kamala Godwin amependezewa na blogu zinavyofanya kazi, ameamua kujiunga kwenye mtandao huu, yeye anapatikana hapa mtembeleeni.

2006-05-23T03:26:00.000-07:00

Hawa wameumbwaje?

Burning Spear aliuliza hivi, ….Unakumbuka siku za utumwa? Babu zetu walivyochukuliwa kama vifaa vya kufanyia kazi. Wengine wengi mpaka leo wanahoji hivi utumwa ulikuwa halali? Maswali huwa hayaishii hapo tuu, mengine mengi hufuatia kama vile ukiwa Afrika na makazi ya waafrika kote duniani utasikia maneno haya …..Unajua hawa watu wa ulaya wanatunyonya sana! Ukiwa kwenye maeneo ya wazungu ukikutana na waafrika wengi wao watakwambia Unasikia bwana hapa tatizo kubwa ni kubaguliwa, tunachukuliwa sisi (waafrika) kama watu wa daraja la chini sana … Ukikuta maraisi wa Afrika kwenye mkutano wataongelea tofauti katika mgao wa biashara baina ya nchi za Afrika na za magharibi( Ulaya na Marekani) hawa hujadili njia madhubuti ya kuleta usawa na kuzinufaisha nchi za kiafrika katika biashara ya dunia.
Dunia nzima na sasa hata watoto wao wazungu sasa wameanza kuwasema baba, mama, babu na bibi zao kwa wanachowafanyia waafrika na wa-Asia kiasi cha kujitolea maisha yao kupambana na Dola zao. Lakini wengi wao hawatajibu au kufanya lolote kuhusu jambo hilo na wala hawatachukia maneno yako wala kuyafurahia.
Ukimsikiliza Tony Blair , Joji Kichaka na wengine wa aina hiyo watakubali machono mwako kwamba waafrika wanadhulumiwa na kuna haja ya kufanya mabadiliko ili kubadili mfumo uliopo sasa na kuahidi kutoa kipaumbale kwa jambo hilo.
Wataunda kamati za kushughulikia jambo hilo lakini matokeo yake yatakuwa labda hawataongelea tena matokeo ya kamati hiyo au ufumbuzi utakaotolewa utaleta matatizo na manung’uniko mengi zaidi!
Cha kushangaza ni uvumilivu wa wazungu kuhusu kauli zinazowakosoa na manung’uniko wanayopata kutokana na matendo wanayowafanyia watu wa asili nyingine tofauti na zao. Nashindwa kuelewa uumbwaji wao ulikuwa wa aina gani kwani sisi waafrika tukisemwa kidogo huwa tunajirekebisha na kufuata ushauri tuliopewa na “wenzetu”.

AU, NEPAD NA Viongozi

2006-05-23T03:10:00.000-07:00

Nimesoma mawazo haya kwenye NewAfrikan na kushangaa kweli kuhusu ukweli wa saga la Charles Taylor. Sijui huku kugeukana kutaisha lini!. Bonyeza hapa usome na mimi.

Unawasikiliza hawa?

2006-05-18T03:44:00.001-07:00

Ndesanjo ametuwekea kiunganishi kwenda kwa baadhi ya watu hawa lakini sidhani kama huwa tunajaribu kuwapitia. Hawa ni washairi wa ki-reggae wanachanganya usomaji wa mashairi na midundo ya reggae katika hali fulani ambayo inapendezesha sana mashairi yao.

Kushoto kabisa anaitwa Michael Smith yeye habari zake nyingi hazijulikani sana lakini niliwahi kupata kazi yake moja kwenye shairi la 'me cyant believe it' na lingine ambalo sikumbuki jina lake. Inasemekana kutokana na msimamo wake dhidi ya chama kilichokuwa kinatawala na ukali wa maneno yake wafuasi wa chama tawala kule Jamaika walimvamia akiwa sokoni na kumponda mawe mpaka mauti yalupompata.

Hizo mbili za katikati ni Mutabaruka maarufu kwa mashairi ya ukombozi, Yeye habari zake zipo kwenye kiunganishi katika jina lake. Nakumbuka alipohojiwa kwenye muhutasari wa maisha ya Peter Tosh alisema kwamba... unapodai haki yako huhitaji kujadiliana na mdaiwa wako maana unakuwa unaipoteza haki yako..... na katika mahojiano mengine alisema ..... Afrika inasubiri waumbaji wake.... Jaribu kumfuatilia.

Picaha ya mwisho wako wawili, kushoto ni Benjamin Zephaniah, maarufu kwa mashairi na mweusi ambaye alikataa tuzo ya OBE aliyopewa na Malkia lizabeth, rudia siku Beckham alipopewa tuzo hiyo, kwa madai malkia hawajali waafrika ili anajikomba kwake. Kulia ni Linton Kwesi Johnson, aliyeshangilia upinzani dhidi ya ubaguzi wa weusi uingereza, katika shairi hilo alisikika akisema, .... kidonge cha ukandamizwaji kilitapikwa na polisi wawili walikufa..... kama ishara ya ushindi dhidi ya ubaguzi.

Wote wanne ni wazaliwa wa Jamaika .Mutabaruka yeye anaishi Jamaika, Kwesi na Benjamin Zephaniah wanaishi uingereza.

Miaka 25 ya kifo cha Bob Marley...

2006-05-16T03:50:00.000-07:00

Wiki iliyopita kulikuwa na sherehe na matamasha ya kumkumbuka gwiji la reggae Bob Marley, kama anavyojulikana na wengi,
mwingine alifanya kumbukumbu hiyo kwa njia nyingine, Huyu sio mwingine bali ni rafiki wa karibu sana wa Bob Marley na mpiga gitaa wake maarufu Aston Barret au "Family man". Kumbukumbu yake ilikuwa ni kukumbuka jinsi alivyosaidiana na Bob na wengine wanavyofaidika siku hizi na yeye na ndungu wa marehemu mdogo wake walivyoachwa masikini bila kukumbukwa, madai yaliyomfanya afungue kesi mahakamani na nakala ya hukumu yake
hii hapa .

2006-05-04T07:16:00.000-07:00

Moto moto moto kila mahali ....

2006-05-04T06:12:00.000-07:00

Nimejaribukuweka tena viunganishi nilivyokuwa nimekosea kama mlivyonishauri na sasa viko fiti kwa kufanyiwa tizi. Angalia nakala iliyopita ya blogu kila mahali ujionee ilivyo.
Picha pia zimeanza kuonekana unaweza kuona nyingi zaidi kwenye flickr Lakini hii isimtishe Michuzi kwamba staili yake imeingiliwa na kupikuliwa, bali imehamasisha blogu nyingine zaidi. sijui Mpoki Bukuku alihamasishwa kwa muda tuu!( just a passing glance) Motowaka hata "share a moment" na michuzi ataishi pale.

2006-05-04T05:13:00.000-07:00

Ingawa sasa nimebadilika kidogo, Hii ilikuwa Mwaka 2003 Nilipokuwa picha ya kwanza Capetown na ya pili kwenye basi Livingstone, Zambia. Bado najilaumu kwa kutopiga picha nyingi na nzuri kuliko hizi.

Vibaraza vinaendelea.....

2006-03-29T05:29:00.000-08:00

Vibaraza bado vinaendelea, kuna kipya cha Simba na Yanga lakini mwenyewe hasemi kama ni Simba au Yanga ,mimi naona kakaa kama Yanga vile,
Mtembelee hapa. Umuulize yeye ni simba au yanga, asipojibu shauri yake.
Mwandani sasa ameweka picha yake lakini sio mojakwamoja kama humjui huwezi kujua ni nani yule, lakini binti Simba anatuambia
huyu ni mwandani. Hilo afro bado lipo kama siku tulipoachana Tambaza Boys sekondari.
Yule mnakala maarufu wa mwananchi, Yahya cherehani na yeye pia ameingia kwenye blog,Naona sasa blog zinateka watu wote waume kwa wake wenye habari motomoto. Yeye
anashona kuliko cherehani ya mchina bila kutia umbeya na uwongo wa wanasiasa.
Ndesanjo naye kwenye nyumba yake mpya mambo bado ni moto sana.
Angalia kesho vibaraza vitakuwa vipi.

Bado nipo..

2006-02-24T23:43:00.000-08:00

Sio kama nimeondoka kimyakimya bado nipo ila mambo yaliingiliana kidogo ndiyo maana niko kimya. Wordpress imekuja kwa kishindo kama ilivyokuja Blogspot inatamanisha kuhamia kwenye hayo makazi mapya, bado ninafikiria kama yatakuwa mapya siku zote au ndiyo kilekile, kipya kinyemi na kuwa wa kileo hata kama hujafika leo!
Ndio ninapata matatizo kidogo kutumia blogspot, mpaka leo sijaweka picha yangu hapa,labda nimezoea "cut and Paste" iliyorahisi bila kuzungukia njia nyingine, lakini hapa tunapendana zaidi kupaacha sio rahisini kama kukubali kufa na kuwaacha uwapendao dunuani.
Mijadala inazidi kupanuka, kila kitu kinawekwa wazi hapa. Kuna kusanyiko la waandishi wa habari, wasomaji wa habari wanaopenda kugawia wenzao habari walizoziona kwenye sehemu mbalimbali, watu wa soga, watuma picha na wa udaku pia. Wanablogu wa kiswahili tumeungana kwa kiasi kikubwa, sote tunashirikiana na kujuana kwa majina ingawa hatujuani kwa sura, siwezi kusema kwamba hakuna wanablogu wa kiswahili walionje ya mtandao huu.
Blogu nyingi zimevuma hapa wakati kama hii yangu inatokea kwa nadra na bila viunganishi motomoto, ukitaka viunganishi motomoto unaweza kupitia makene, ndesanjo , Nambidza na kuzunguka kwenye blogu zote za kiswahili zilizo kwenye mtandao huu.
Ushirikiano na kutembeleana kati yetu tuuendeleze, tusiwaache wenzetu waliohapa maana wametueleza walipohamia hivyo bado tupo nao, tuwatembeleeni ili tuendelee kufaidika na mawazo na ufahamu wao.

Salaam ndugu...., habari za nyumbani? watoto?

2006-01-10T04:34:00.000-08:00

Fikiria maisha yatakuwaje iwapo pale utokako nyumbani asubuhi kila uingiapo salamu zitafuata mlolongo huu.

Uingiapo kwenye Daladala unaanza kumsalimia mpiga debe ndugu habari za kuamka, nyumbani hawajambo, mama? watoto? halafu unahamia kwa konda, Habari gani? Vipi kazi leo? imeanza vizuri? mbona unaonyesho uchovu asubuhi hii yote? hukulala nini?. Naye konda anaanza kupita kwa kila mtu habari kaka/dada, Leo umechelewa kutoka? au mabasi ya shida leo? poleni sana, naomba nauli.

Mwendo unakuwa huu huu kwa kila unayekutana nae siku hiyo muuza chai, muuza machungwa,walinzi, makarani wa benki, watu wanaofanya promosheni maofisini na ndugu zao machinga, bila kusahau unaingia kwenye blogu zote unaweka salamu za asubuhi kwa kila moja.

Fikiria tena utatumia muda kiasi gani kutoa hizo salamu zote! utakuwa katika hali gani? utaweza kuendelea na kazi siku hiyo? Kazi ngapi zitasimama? foleni itakuwa kubwa kiasi gani?.

hivyo ndiya watu wanavyotaka iwe siku yao na wewe pia uwaige .

Tunapinga na kupinga...

2005-11-23T04:43:00.000-08:00

unajiita sauti ya wanyonge,
lakini muda pekee unapotoa sauti yako
ni pale unapopinga walichosema wenzio....
Bahati dube, wimbo: mchezo wangu (my game).

Nimekumbuka wimbo wangu kipenzi toka kwa gwiji la reggae dube, sijui kama wimbo huu uliwahi kupata tuzo, labda ni muendelezo wa hadithi za muziki wa kitumwa wa kisasa zilizoanziswa na msangi, ndesanjo jeff na nkya kudakia.
Wanablogu tunataka kuingia kwenye hali hii, tunajifanya kwamba ni sauti za wanyonge lakini kumbe tunachofanya ni kupinga wanachofanya wenzetu, sijui tuna wivu sana kwa kukosa maendeleleo kama wao ama ni kutaka kuwa juu ya watu wote!
Wenzetu wa kizazi kipya, kisichojua tofauti ya uhuru na utumwa, Utamaduni na hadithi, Chao na cha wenzao, mwanzo na mwisho.... na kuuita muziki wa kizazi kipya, kama tulivyo tumedakia na kuupigia kelele wakati hata siku moja hatujawahi kuwaonyesha mathalani kuwafundisha muziki wetu uko vipi, Sembuse kuwapa nafasi ya kutatua matatizo yao kupitia muziki WETU, tunatarajia vijana kuupenda muziki wetu na kuacha mingine inayowafikia kwa urahisi kuliko yetu.
Tuliangalia Mashirika ya umma yakiteketea, bila kufanya juhudi za kuyaokoa,siyo kulia tu ila kwa kujitolea hata damu kuyatetea kama mashahidi wa uganda walivyomtetea yesu kwa kabaka, tuliona ni sawa tu kwanza hayatupunguzii kitu na wala hayatuhusu!, ukweli ukaonekana kwamba tunahitaji yawepo kwani huduma zake zilihitajika sana, serikali ikaona njia pekee ni kuyabinafsisha lakini wakaanza sasa yanafanya uzalishaji kwa ufanisi wanablogu tunalia nchi imeuzwa! labda kati ya aliyeiua na anayeiuza ili ifufuliwe, wapili ni mbaya zaidi.
Serikali kivuli nayo iko kama wanablogu, wanaingia bungeni bila mipango, halafu ni mabingwa wa kukataa, ili wawape lawama serikali ikishindwa kwenye mipango yake. tunakuwa mabingwa wa kuchambua mipango ya wengine wakati hatuna yetu, Ila tunamawazo yanayopinga maamuzi ya wengine ingawa nayo pia tunayapanga tukiwa usingizini bila kuwashirikisha wanaolengwa na mipango hiyo. Sijui kama tukifanya sensa leo ya mambo yanayoandikwa kwenye blogu, mangapi yatakuwa sio mawazo binafsi ya mwanablogu aliyeyaandika? tukiendeleza sensa hii na kuangalia ukubalikaji wa hoja za blogu, sijui kama kutakuwa na hoja zao ila tu zetu hazipewi nafasi kwa sababu hatuna dola ya kuzisimamia. katika pitapita yangu kwenye vibaraza vingi nimeyaona haya, kila mahali wanamambo wanayoyapenda, ila hakuna kibaraza kinacholengana ma mawazo ya serikali!
Mwanamapinduzi Walter Rodney alianza kuishinda hali hii, kwenye mafundisho yake aliyaita "grounding with my brothers" aliwakusanya vijana na wanamapinduzi kisha kujadiliana nao, hii iliamsha ari yao ya mapinduzi na kumfanya rodney awe chakula cha risasi.
tuangalie sisi tufanye nini.

Makosa na usahaulifu.

2005-10-12T04:30:00.000-07:00

Barua niliyomwandikia ndugu yangu nkya, sijui kam inaukweli ndani yake au inaweza kutumika kuombea PHd kwenye fani ya siasa.
Ndugu Hilo ndilo kosa la ANC naona liko kama kosa la Nyerere, yeye hakuamini kama ujamaa unaweza kuanguka, ilikuwa ni dhambi kama kufikiria kuwa papa. Alijenga mashirika ya umma bila kuwapa umiliki wananchi hivyo ujamaa ulipoanguka na hayo mashirika yalishindwa kuendeshwa na wananchi, sasa wakipewa wazungu kuyaendesha tunapiga kelele bila kutafuta chanzo, angalia wachina naona mao alijuwa hiki kitu akaandaa watu wake ili kuwa tayari kumiliki uchumi iwapo ukomunisti ungeanguka ndiyo maana wachina hawanashida na mwekezaji toka ulaya.Kila mchina ana uwezo wa kutengeneza kitu ambacho sisi tunatumia dola nyingi kuviagiza. Sijui fani yako, lakini naona kama sio technolojia ya chuma uchumi wa ulaya usingekuwa hapo ilipo sasa, wameweza kutengeneza vyombo vya usafirishaji, mitambo na pia vifaa vya kilimo vilivyowapatia maendeleo ya haraka. Sijui kama wangengoja wa-kushi wawatengenezee hivyo vifaa wangekuwa wapi sasa?. Sina takwimu sahihi lakini naona kama technolojia ya chuma hapa Tanzania haithaminiwi ndio maana tunaingia karne ya 21 bado tunatumia jembe la mkono!. Marekani iliendelea kwa kuwafanya waafrika watumwa wao kwenye mashamba na migodi, hilo sisi hatuliwezi, lakini tunao ng'ombe wengi wenye nguvu kama nyati kwa nini tusiwatumie kukuza kilimo? Ukinichagua mimi nitaleta maendeleo bila wananchi kujifunga mkanda, ghafla mahitaji yatajaa madukani, na pesa mifukoni hawaongelei, ukweli ni havitakuwa vya waliowapigia kura! Angalia ikapa hapo, huna haja ya kuwasha gari kwenda kazini, unauhakika wa kupanda treni au kama ni mwoga 'Golden arrow' ipo. Nini maana yake 1. Unakuwa umetunza mazingira kwa kutotengeneza moshi mchafu kuliko ukoma. 2. Umepunguza mafuta ambayo serikali hutumia mamillioni ya pesa za kigeni kuyaagiza baada ya kuhudumia wakulima na sekta nyingine zenye umuhimu. 3. Badala ya kuendesha gari ukiwa peke yako na kuleta msongamano mjini, utaupunguza kwa kutumiausafiri wa jumuiya- ambao ni nafuu zaidi kwa gharama.
Hayo ndiyo maoni yangu. Mjadala uko wazi kuchangia.

Samahani

2005-10-05T04:32:00.000-07:00

Nimejaribu kualika watu pasipo na viti, samahani nilisahau, nafasi za watu kukaa. Walikuja wengi sana wakakuta hakuna nafasi ya kukaa hata mtu mmoja, sijui kama waliondoka kimyakimya kama mchungaji anaposisitiza watu wachangie sadaka nyingi zaidi au walitukana kama siku yanga ilipofungwa na simba.
Unajua kila kitu kina aina yake, kama vile wengine huandaa tafrija ndipo waalike watu kusheherekea kwa kunywa na kula lakini wengi hualika watu kuja kusaidia kuandaa tafrija hata kama haiwahusu au haina ulazima kwao wanatakiwa "kuchangia" ili ifanikiwe. Samahani hivi mimi ninaonekana niko kwenye kundi lipi?
Habari huandikwa na mwandishi wa habari lakini mimi sio mwandishi wa habari wa kuandikia watu, nataka watu waniandikie mimi nizisome habari zao, mko tayari kuniandikia bila malipo? Je watu hupenda kusoma kila habari iliyopo, sijui kama ukimwanbia Rasta afrika siyo kwao atakusadiki, labda ukitumia njia nyingine ambayo sijawahi kuisikia .
Habari zipo nyingine ni nzuri na nyingine ni mbovu nani anajua habari iliyo nzuri kila wakati, kama ni hivyo waandishi wasingekuwa wanazeeka na kujiuzulu kila siku au kufukuzwa kazi kwa ufanisi mbovu.Sio kama sikubaliani na uwapo wao, ila nahitaji kuwa na busara zaidi ya ile ipatikanayo toka kwa mmoja mmoja.
Kaa tuongee nilikuta nyumba ya wageni moja pale livingstone nchini zambia inaitwa tulye tonje nikaambiwa maana yake ni kaa tuongee, sijui kama itakuwa na uhusiano na hii kaa tuongee, hapa panaendeleza na hatufanyi mambo ambayo yatamdhuru mtu, sikumbuki kilichokuwa kinafanyika tulye tonje, maana nilifika usiku na mchovu wa safari hivyo nilifurahia kupata kitanda kama nimefika safari yangu.
Karibuni tukae tuongee, kila mmoja ashiriki katika maongezi haya tupate kilicho kweli hata kama kitawauma wengi na wachache wengine wajue kwamba wamekalia misumari na wasiponyanyuka haraka itawachoma washindwe kukaa kesho kama kesho huwa inafika.

Karibuni

2005-09-28T07:20:00.000-07:00

Kaa tuzumze,
tuongee mambo mazuri,
tuelewane kwa maongezi,
pesa za kidunia zisituingilie,
wahenga nawaalika,
kwa heri na busara,
shari ikae mbali,
hata wanyonge wajongee,
walio mbali watusikie,
wakaribu watuone,
wasiojua uzuri wa tausi,
hawajui thamani yake,
tupendao usikivu,
twajua busara zake,
kila mmoja anaijua,
hata kama hajaipata,
siwezi kuitaja,
msaada naomba,
niweze ipa jina,
na wote waipate....